સાકાર સ્વપ્નું


સાકાર સ્વપ્નું, કોકિલા રાવળ
(‘મમતા’ અંક ૮ની છેલ્લા પાના પરની વાર્તા સ્પર્ધાના પ્રતિભાવ રૂપે)

mamata-jun-12

પ્રતાપસિંગ ટ્રાવેલ એજન્સીમાં કામ કરતો હતો.  તેને દેશદેશાંતર જવાનો, જોવાનો બહુ શોખ હતો.  તેના કમ્પ્યુટરના જૉબ પરથી જ્યારે એ રિટાયર્ડ થયો ત્યારે એ હરવા ફરવાના સપનાં જોવા લાગ્યો.  પણ તેની વહુ પ્રકાશકોરની તબિયત સારી નહોતી રહેતી. તેથી વહુની અને ઘરની બધી જવાબદારી તેની ઉપર આવી ગઈ હતી. છતાં તેણે ગમે તેમ સમય કાઢી ટ્રાવેલ અજન્સીમાં બપોરના ચાર કલાકની જૉબ લીધી.  બપોરે બપોરે પ્રકાશની બહેન કે મા પાસે આવી બેસતી એટલે એકલી મૂકી ને કામે જવાની કોઈ ચિંતા નહોતી.  દિવસે દિવસે વહુની તબિયત ક્ષીણ થતાં અંતે બિચારી ગુજરી ગઈ.

વહુની યાદ બહુજ સતાવતી હતી.  એક વાર લંચમાં તેનો બૉસ તેને બહાર જમવા લઈ ગયો. બૉસને ખબર હતી કે પ્રતાપસિંગ બહુ ગમગીન રહેતો હતો એટલે એણે સૂચન કર્યું કે, “તને જુદા જુદા દેશમાં મોકલવાનું નક્કી કર્યું છે. તારે ત્યાં જઈ ત્યાંની બેસ્ટ હોટેલ અને રેસ્ટોરન્ટ કઈ છે તે તપાસ કરવાની. ફરવાની તથા શૉપિન્ગની જગ્યાઓની નોંધ રાખવાની. બધા સાથે ભાવતાલ કરી પૂરું બાર્ગેન કરવાનું. પછી ઍર, બસ બોટ, ટ્રેઇન વગેરેની તપાસ કરવાની.” આ પ્રતાપસિંગના  રસનું કામ હતું એટલે તેમાં તેનું મન ખૂંચે તેમ લાગ્યું.

પહેલે ઉનાળે પોર્ટો રિકો (Puerto Rico) જવાનું નક્કી થયું.  ફિલાડેલ્ફિયાથી ઉપડેલું  પ્લેઈન વચ્ચે એક સ્ટોપ કેરોલિના કરી પોર્ટો રિકોના સાન વાન (San Juan) શહેરમાં પહોંચ્યું. ત્યાંથી શટલ બસ લીધી. અહીં બધીજ બસ લેડીઝ ચલાવતી હતી.  પોર્ટો રિકો અમેરિકામાં જ ગણાય એટલે વીસા પાસપોર્ટની ઝંઝટ નહોતી. મોટી મોટી કંપનીઓ, ફાર્માસૂટિકલ ઇન્ડસ્ટ્રીઝ વગેરે જોતો જોતો સાન વાન શહેરની હોટેલમાં પહોંચી ગયો. જુના સાન વાન  શહેરની બાજુમાં નવું સાન વાન થયું છે. તેણે જુના સાન વાનની જગ્યા પસંદ કરી. ત્યાં જરા ઠરીઠામ થયા પછી ગામ જોવા નીકળ્યો. પુરાતન મકાનોની કોતરણીઓ, જુદા જુદા રંગથી રંગાયેલા ઘરો, કૉબલસ્ટોનના રસ્તાઓ જોયા. ફાવે ત્યાંથી ચડો અને ગમે ત્યાં ઊતરો. આ સર્વીસ સિટી તરફથી મફત છે. તમે ભૂલા પણ ન પડો, કારણકે બસો જુના સાન વાન અને નવા સાન વાન વચ્ચે  આંટા મારતી હોય. સ્પેનીશ ભાષા જાણો તો વધારે સહેલું અને સરળ બને. પ્રતાપસિંગે એક ઇન્ગલિશ / સ્પેનીશ ડિક્શનેરી લીધી. અને પછી આજુબાજુના બીચ જોવા નીકળી પડ્યો. ભૂખ લાગે ત્યારે લલચામણું લાગે તે લઈને ખાઈ લેતો.

બે ત્રણ દિવસમાં  બધાં ખંડિયેરો, ચર્ચ, ટાવર, મુખ્ય રસ્તાઓ, અવારનવાર આવતા ચોક, ટાવરો જોઈ નાખ્યા. એને ખબર પડી કે પોર્ટૉ રિકોની અગ્નિ દિશામાં એક સરસ ટાપુ વિઆકેઝ (Vieques) જોવા જેવો હતો. સાન વાનથી એક બસ પૂર્વ કાંઠા પરના ફાહાર્ડો (Fajardo) લઈ જાય અને ત્યાંથી એક કલાકની બોટ રાઈડ ટાપુએ પહોંચાડે. ત્યાં ઊપડ્યો. કાંઠા પરની એક હોટેલમાં ઉતારો કર્યો.  ત્યાંથી થોડે દૂર શટલ બસ કરી બાયોબૅઈઝ નામની જગાએ ફરવા ઊપડ્યો. રાતનાઅંધારું થાય તેવા સમયે લગૂનના પાણીમાં વસતા એક જ કોષવાળા જંતુઓ  રહે. રાતના સમયે એક બોટમાં બેસાડી લગૂનના કેન્દ્રમાં લઈ જાય. પછી જેને પાણીમાં ધૂબકા મારવા હોય તે મારે. પાણી હલાવવાથી જંતુઓના કોષમાંથી ઉજાસ નીકળે. (આને Bio-luminiscence કહે છે). પ્રતાપસિંગને બહુ મજા પડી અને અચરજ અનુભવ્યું.  જે પાણીમાં પડવા માગતાં ન હોય તેને માટે બે ચાર બાલદીઓમાં આ દરિયાનું પાણી ભરી બોટના તૂતક પર મૂકેલી.  અંદર હાથ નાખી હલાવો ત્યારે નરી આંખે ન દેખાય તેવા જંતુઓ ચળકવા લાગે.

પ્રતાપસિંગ બે ત્રણ દિવસ પછી બોટમાં ફાહાર્ડો પાછો ગયો. ત્યાં બોટ પર ચાર લેડી ટૂરિસ્ટની ઓળખાણ થઈ ગઈ. બધીનો સ્વભાવ મળતાવડો હતો.  કૅલી, સૅલી, મૅરી અને જ્યૂડી સાથે ફાહાર્ડોમાં અને પછી સાન વાનમાં ડિનર ડાન્સ કર્યાં, હર્યાફર્યાં.  પ્રતાપસિંગ ચારે જણીનો ખ્યાલ રાખતો. તેઓના સામાન ઉંચકાવે, તેમને હાથ પકડી બોટમાં ચડાવે ઊતરાવે.

આમ અઠવાડિયાના અંતે પાછાં ફરવાનો સમય આવ્યો. પોર્ટો રિકો છોડતાં પહેલાં છેલ્લે દિવસે બધાંની યાદગીરી રહે માટે ચારે લેડિઝ સાથે ફોટા પડાવ્યા. અને બીજા વર્ષે ગ્વાટામાલા મળવાનાં પરસ્પર આમંત્રણો આપી પ્રતાપસિંગ છૂટો પડ્યો.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s